Have a break. Have a Knick Knacks.
O sige magbinisaya sa ko, kay gipadalhan man ko ug elektronikong suwat ganina sa Bisayablogger Moderator; ana siya na kung pwede daw, kay nag apil-apil man kuno ko sa ilang grupo, e di mag-Binisaya pud ko sa pagsulat sa akong blog. Tama siya, nakita man pud nako ilang punto. Pero pasinsyahi lang gyud ha, kay dili gyud ko pwede mag-Binisaya sa kanunay. Kay aron masayod lang ka, Inggles man akong gikuhang kurso sa pagkakaron; kinahanglan pud nako mag-praktis ug iningglis. Ayaw kabalaka, kay himuon nako ni mga kausa sa isa ka semana kay malingaw man pud ko mag-Binisaya.***
Sus ganiha diay, hastang laguta nako! Kay nakamata na pud ko ug wala sa oras kay saba kaayo ning batang gamay sa among kapitbahay! Buntag sayo magsige na ug tsabaw!!! Utro pud ning lola, lolo, mama, ug papa sa bata kay aron mapahunong ang bata sa iyang pagsinggit singgit, kantahan man hinuon anang "Aleluya" ni Bamboo! Kana ganing sa Pepsi na adbertisment, kanang "WOO-OO-HOOO--OH"? O kana! Mag sige silag kanta ana para siguro mapakatawa ang bata! Lintik na lang gyud! Unsaon na lang man nako pagtubo ani na dugay na gani ko makatulog, matahon pa gyud ta'g sayo pirmi aning "Woo oo hooo oh"?!? Abno man siguro ni among kapitbahay...
Mao to, nakatulog ra pud ko balik kay nindot kaayo ang panahon: bugnaw ang hangin, human natago pa gyud sa panganod (clouds?) ang adlaw! Mao to nagpadayon na ko sa akong damgo--sa dihang nahinumduman nako na Martes man diay karon! Aduna diay ko'y klase karong 9:15! Sus pirteng pamalikas na pud nako kay lami gyud kaayo sa katanan na matulog hangtod udtong tutok sa ani nga panahon! Lain pa gyud akong paminaw, mura ko'g gikalintura kay kalipungon ko human init akong lawas. Naghuna-huna ko: "Unsa kaya kung ma-absin ko karon? Dili man gyud makaya sa akong lawas na maligo karon..." Maayo na lang kay nahinumduman na pud nako na niingon diay si Ser Don katong niaging Huwebes na dili na usa mi manulod sa iyang klase kay hatagan daw mi niya'g oras na buhaton among pradyek. Ha-hay pirte nakong pasalamat sa Ginoo kay gihatagan gyud ko niya ug dugang oras na matulog. Niana ko sa akong kaugalingon na matulog ko'g mga usa'g-tunga na oras, human mumata na dayon dapat ko arong makasulod sa akong 11:00 na klase. Nipiyong na pud ko'g pagka-usab...
***Ang akong ikaduhang damgo na samok kaayo***
Nakamata na pud ko ug usab. Libog kaayo ko, wala ko kabalo unsang oras na--nahadlok ko basi'g nasobraan ko ug tulog. Gikuha nako ang selpon sa akong kilid ug gitan-aw ang oras: Syet! Ingon sa relo 10:55 na! Naloko na, wala na gyud ko'y mahimo, muabsin na lang gyud ko sa klase ni Ser Mac. Mao to, nipiyong na pud ko'g pagka-usab...
***
...Nakurat ko pagmata kay nikurog akong selpon. Gikuha dayon nako ang selpon sa kilid ug gitan-aw ang oras: 9:30. Pagkasamok na lang gyud, musulod lang diay gihapon ko ani ug eskwelahan. Imbes na murag giganahan na unta ko'g huna-huna na dili na lang musulod sa klase ni Ser Mac... Ay oo, naa diay ko'y mensahe gikan kang Faith. Gikumpirma niya na wala gyud mi klase kang Ser Don. Paghuman nako'g basa, nibug-at akong mata, dayon tulog ug pag-usab.
10:25 na ang oras tong sunod nakong pag-mata. Buot pasabot naa lang koy traynta-singko minutos arong maligo, mag-ilis, mukaon, mag-tutbras, ug mag-adto paingon sa eskwelahan! Napugos na lang gyud ko ug bangon kay mahadlok ko muabsin sa klase ni Sir Mac; basi pag adto nako sa sunod na adlaw, di na ko kasabot sa dagan sa iyang lektyur--taasan pa gyud ko niya ug usa ka kilay. Nahuman ko ug ligo sa sulod sa kinse minutos, ilis ug kinse minutos pud. Maski nag bukal bukal akong tiyan, wala na lang ko nikaon ug dayon nag-tutbras. Nitawag na lang pud ko ug Holiday taxi kay dili na ni madala ug dyip-dyip. Nihawa ko sa balay eksakto alas-onse--pamati nako nagsugod na ang klase namo sa Diskurso. Wala ko'y labot, basta musulod lang ko, bahala ulahi.
Katong naa na ang akong gisakyang taxi sa kilid sa Bangko Sentral sa dalang Tiongko, nahuna-hunaan nako ug tan-aw sa akong pitaka; singkwenta na lang man gud ang nabilin ato, human nahurot yata nako ang mga kuwins sa pamasahe gahapon. Wala gyud ko nasayop: 50.75 ang eksaktong sulod sa akong pitaka. Gisilip nako ang metro: 48.........--bagang!--ni-49 dayon! Hala, unsaon na ni, dili jud ko kaabot ug Ateneo Claveria ani!!! Tama gyud ko, pag abot namo sa dalang Quirino, atubangan sa Bangko Sentral ug sa Davao Central Convenience, nipatak na ug singkwenta ang metro. Gipahunong na lang nako si Manong sa kilid sa prutasan na Madrazo, human nag-desisyon ko na lakwon na lang ang Ateneo gikan sa dalang Acacia(kanang dalan gud na walay naga-aging sakyanan, igo lang istambayan sa mga bus sa Metro Shuttle sa una. Mabini man siguro na, ambot lang.)
Abog sa dalan, ga-itom na aso gikan sa mga tambutso sa mga dyip, akong palda nag-lupad lupad sa akong kada lakang, akong buhok na wala'y sudlay gikan pa sa pagsakay nako sa taksi--wala ko'y labot basta lakaw lang gyud ko hantod sa makaabot sa geyt sa dalang C.M. Recto(dili na diay na siya Claveria, pahinumdum ni Sir Mac). Gitan-aw nako ang oras sa kompyuter sa mga sikyo--11:26 pa diay. Bakakon jud nang orasan sa mga taksi sa Holiday oy! Nganong magpa-adbans-adbans man daw na sila? Pakulba-kulbaan ra jud nila ilang mga pasahero.
Nag-elebeytor na lang ko kay dili man taas ang pila. Wala na ko kabalo sa akong hitsura, pero basin dili na maayo kay ginatan-aw man ko sa mga nakapila sa akong tuo ug wala. Ay wala na ko'y Kiber, basta nisakay ko sa elebeytor.
Pagduol nako padulong sa among klasrum, natingala ko kay mura ug wala man nagsiga ang suga.
Pag-abri nako sa purtahan, hipos kaayo ang mga bang-ko.
Wala diay klase.
P.S. To those who feel alienated by my post since it's written in the vernacular, I can only offer an apology. For a translation in English, click this
posted by Adobobo @ 8:55:00 PM
Comments:
0
